رحلة معرفة النفس - ما ينبغي أن تضعه نصب عينيك قبل الدخول

-     معرفة النفس رحلة طويلة جدًا، رحلة قد تستغرق من الإنسـان عمره، وتظل رحلة متحاوطة بالشك الدائم، الشك اللي ممكن يستمر طول فترة بقاء الإنسـان، مش رحلة للساحل، ولا شيء بيتعمل في أوقات الفراغ، مش شيء سهل، وحلو، وجميل، شيء صعب، معقد، وقاسي، قاسي جدًا، بيفتح جروح قديمة، ويسيبك تعاني منها، وتعيش المعاناة دي، بيحررك من أوهام بتفضل محفورة فيك، بيخليك أنت اللي ماسك الدفة. .

-     الأسهل في الحياة إنك متعرفش حاجة، لا تعرف نفسك، ولا تعرف حاجة، المشي بالميكانيزمات الدفاعية، أو الحيل الدفاعية سهل، المشي باللاشعور سهل، رمي كل الأخطاء على الخارج سهل، الظن بإن الناس هما المشكلة، والمواقف هي المشكلة، وإنك أنت كويس، ولو اتحطيت في زمن تاني أو وضع تاني هتبقى حد جميل سهل. .

-     الرحلة دي زي كل رحلة، فردية، مهما بدا لك غير ذلك، في علامات، وإرشادات بتنور الطريق، لكـن تظل رحلة فردية، رحلتك الخاصة. . اللي أي حد يقولك إنه  هو اللي هيوريهالك وهو اللي هيخليك، وهو اللي واللي هو في الأغلب جاهل، أو مخادع. .

-     الرحلة بتطلعك على الوحش اللي جواك، بتحطك قدام نفسك، بتوريك إن الأزمة فيك أنت رغم كل شيء، بتقولك إنك مسؤول، بتخليك محطوط في أزمة، لا أنت عارف ترمي الحمل على الناس زي زمان وتهرب، ولا أنت عارف تغير، الرحلة بتخليك على يقين إن المشكلة داخلية، وبتحطك قدام إنك محصلة للسابق، محصلة للماضي، محصلة للأفكار اللي اتكبتت، واتخزنت وبتحركك، محصلة لرغباتك وشهواتك، محصلة للي أنت نفسك توصله، بتوصلك لدرجة إنك تلاقي إنك غير مسئول عن حياتك، ثم تحطك قدام نفسك من الأول، وتأكدلك إنك مسئول، مسئولية تامة عن كل ردود الأفعال اللي بتاخدها، أيًا ما كانت الظروف، بتقف تستعجب وأنت بتحاول كل مرة، وأنت عارف إنك عندك قدرة على الاختيار، وللأسف مش عارف تختار، ولا عارف تشيل. .

-     رحلة التعرف على النفس رحلة في غاية القسوة، الإدعاءات فيها أكثر من الحقايق، مش كل الناس تقدر توصلها، أو تواصل فيها، ومش كل الناس تقدر تتحمل نتايجها، مفيش خطط صارمة، مفيهاش انتقال مباشر من النقطة أ إلى النقطة ب، مفيهاش حاجة سريعة، فيها وقت طويل، فيها فشل كتير، فيها شك دائم، فيها محاولات للصبر المر، وفيها محاولات للصبر على الصبر المر، فيها رعب، وخوف، من الوحش اللي جواك، لكـن هي في نهاية المطاف رحلة، رحلة عظيمة، تدرك بيها إيه اللي بيحصل، وإزاي بيحصل، وليه أنا بتصرف بالشكل ده، وأنا مين، وجاي هنا ليه، وأنا أصلًا عاوز إيه، رحلة محاطة بالفشل من كل حتة، وده بيخليها عظيمة بشكل لا يمكن وصفه بالألفاظ، لكـن مع كل حتة بتنور جواك، مع كل خطوة بتلاقي العتمة فيها بتقل، بتدرك إنه الحمد لله إنك حاولت لحد ما وصلت لهنا، وفي لحظة تانية هتتمنى لو ترجع لما قبل الإدراك، ولكن هيهات هيهات إن ده يحصل.